მედიის როლი ემიგრაციაში — AprioriTV-ს დამფუძნებელი ხათუნა შარაძე ეროვნული ბიბლიოთეკის პანელზე
27 მაისს საქართველოს ეროვნულ ბიბლიოთეკაში დიასპორის დღესთან დაკავშირებით ღონისძიება ჩატარდა, რომელშიც მონაწილეობა მიიღეს როგორც საქართველოს სახელმწიფო სტრუქტურების, ისე დიასპორული ორგანიზაციებისა და მედიაპლატფორმების წარმომადგენლებმა.
ღონისძიების ფარგლებში გამართულ თემატურ პანელზე – „დიასპორული მედია“, მოწვეულ სპიკერად მონაწილეობა მიიღო საემიგრაციო მედიაპლატფორმა AprioriTV-ს დამფუძნებელმა და ჟურნალისტმა იტალიაში, ხათუნა შარაძემ.
თავის გამოსვლაში ხათუნა შარაძემ განსაკუთრებული ყურადღება გაამახვილა იმაზე, თუ რამდენად მნიშვნელოვანია მედიაპლატფორმების არსებობა ემიგრანტებისთვის, როგორ ეხმარება სანდო და ქართულ ენაზე არსებული ინფორმაცია ემიგრანტებს უცხოეთში ინტეგრაციასა და მათი უფლებების დაცვაში. მან აღნიშნა, რომ AprioriTV არა მხოლოდ ახალ ამბებს აშუქებს, არამედ ემსახურება ემიგრანტთა საჭიროებებზე რეაგირებას, მათ სოციალურ მხარდაჭერასა და ინფორმირებას.
„მედია ხდება ხიდი სამშობლოსა და ემიგრანტ საზოგადოებას შორის. ის არ არის მხოლოდ ინფორმაციის გადამტანი — ის არის ემოციური, იდენტობით გამყარებული სივრცე, რომელიც ემიგრანტს აქცევს აქტიურ მოქალაქედ ქვეყნის გარეთ“, — განაცხადა ხათუნა შარაძემ.
ღონისძიება კიდევ ერთხელ წარმოაჩენს დიასპორული მედიის მზარდ მნიშვნელობას ქართულ საზოგადოებრივ ცხოვრებაში და ხაზს უსვამს იმ საჭიროებას, რაც ემიგრანტებს აქვთ ქვეყნისგან ინფორმაციულ და მორალურ მხარდაჭერაში.
AprioriTV ამ მიმართულებით აგრძელებს თავის საქმეს როგორც ემიგრაციის ხმა და სანდო მეგზაური უცხოეთში მცხოვრები ქართველებისთვის.
