ევროკომისიის განცხადებით, 2026 წელი მიგრაციისა და თავშესაფრის ახალი წესების ამოქმედების წელი იქნება, რაც ევროკავშირის ტერიტორიაზე მიგრაციის კონტროლის გამკაცრებას მოიტანს.
ახალი პაქტი, რომელიც 2024 წელს დამტკიცდა, მიზნად ისახავს არალეგალური მიგრაციის შემცირებას, საზღვრების უკეთ დაცვას და წევრ ქვეყნებს შორის პასუხისმგებლობის თანაბარ გადანაწილებას.
ევროკავშირის ინფორმაციით, 2026 წლიდან ამოქმედდება სისტემა, რომელიც მკაცრად გააკონტროლებს ევროკავშირის გარე საზღვრებს და შეამცირებს ზეწოლას იმ ქვეყნებზე, სადაც მიგრანტთა ნაკადი განსაკუთრებით დიდია.
მთავარი ცვლილებები:
საზღვრების გაძლიერებული კონტროლი — Frontex-ის მანდატი (ევროპის სასაზღვრო და სანაპირო დაცვის სააგენტო) და თანამშრომელთა რაოდენობა გაიზრდება; სააგენტო უფრო აქტიურად ჩაერთვება დაბრუნების ოპერაციებში.
სანქციები გადამყვანებისა და ექსპლუატატორების მიმართ – იგეგმება ქონების გაყინვა, გადაადგილების შეზღუდვა და ფინანსური არხების გადაკეტვა.
დაბრუნების ციფრული პროცედურები – ევროკავშირი ახორციელებს საერთო ევროპული სისტემის მოდერნიზაციას, რათა პროცესი გახდეს უფრო სწრაფი და გამჭვირვალე.
ევროკომისიის შეფასებით, ახალი პაქტი აერთიანებს მკაფიო პასუხისმგებლობასა და რეალურ სოლიდარობას, თუმცა მისი მთავარი მიზანი რჩება მიგრაციული პროცესების გამკაცრება და უსაფრთხოების გაძლიერება ევროკავშირში.
წყარო: Commissione Europea / Ansa.it, 27.10.2025
AprioriTV — ქართული მედია იტალიაში
#ევროკავშირი#მიგრაცია#ევროკომისია#თავშესაფარი#ევროპა#Frontex#ემიგრანტები#საზღვრები#AprioriTV
