BREAKING

ემიგრაცია

“ფესვები” – ქართული ცეკვისა და სიმღერის სტუდია ემიგრანტი ბავშვებისთვის ბარიში

ბოლო ორ წელზე მეტია, იტალიის ქალაქ ბარიში ფუნქციონირებს კულტურისა და ხელოვნების ასოციაცია “გურულები”, რომლის ფარგლებში ჩამოყალიბდა ქართული ცეკვისა და სიმღერის შემსწავლელი სტუდია “ფესვები”. სტუდიის დაარსება უფროსმა ქორეოგრაფებმა ლელა შოვნაძემ და აკაკი ქინქლაძემ გადაწყვიტეს, ხოლო დამხმარე ქორეოგრაფად მიიწვიეს სალომე დარჩია. ჩვენ მივმართეთ ქალბატონ ლელას და სალომეს, რათა უკეთ გაგვეცნო მათი საქმიანობა ემიგრანტი ბავშვებისთვის.

ლელა შოვნაძე: „მიზანი მქონდა, ბოლომდე მიმეყვანა ჩემი საქმე“

როდის გაგიჩნდათ იდეა, ქართული ცეკვისა და სიმღერის სტუდიის ჩამოყალიბების?

იდეა და სურვილი ყოველთვის არსებობდა, მაგრამ უცხო მიწაზე მისი განხორციელება ადვილი არ არის. მე და აკაკი ბავშვობიდან ვცეკვავთ, მაგრამ ემიგრაციაში ყოფნისას ხშირად გიწევს პროფესიაზე უარის თქმა. პირველად 2018 წელს გავხსენით სტუდია, სადაც 40-მდე ბავშვი დადიოდა. მოთხოვნა ძალიან დიდი იყო, თუმცა პანდემიის გამო მოგვიწია დახურვა. ფარ-ხმალი არ დამიყრია – სამი წელი საბუთების მოგროვებას მოვანდომე, რომ ყველაფერი ლეგალურად ყოფილიყო და 2023 წელს სტუდია ისევ გავხსენით. უკვე ორი წელია, რაც ჩვენი სტუდია აქტიურად ფუნქციონირებს.

როგორია თქვენი სტუდიის კონცეფცია?

ჩვენს სტუდიაში 5-დან 15 წლამდე ასაკის 40-მდე ბავშვი სწავლობს. ისინი არა მხოლოდ ცეკვას სწავლობენ, არამედ ქართულ გარემოში იზრდებიან. ზოგიერთმა ბავშვმა, რომელიც აქ მოსვლისას ქართულად ვერ საუბრობდა, ახლა გამართულად ლაპარაკობს. სტუდიაში პატარა საქართველო გვაქვს შექმნილი, სადაც ბავშვები ქართულ მუსიკას უსმენენ, ქართულ კულტურას ეცნობიან და ამით ამაყობენ.

იცით, რომ საკმაოდ მკაცრი ხართ სტუდიაში წესრიგთან დაკავშირებით. რატომ?

ქართულ ცეკვას დისციპლინა სჭირდება. ყველა რეპეტიციაზე ვთხოვ ბავშვებს, იყვნენ მოწესრიგებულნი, ეცვათ სტუდიის ფორმა, გოგონებს თმა აწეული ჰქონდეთ. დაუდევრობა და რეპეტიციების გამოტოვება დაუშვებელია, თუ ეს ჯანმრთელობის პრობლემით არ არის გამოწვეული.

გეგმავთ მონაწილეობას ფესტივალებში?

სასწავლო წლის ბოლოს გავაკეთებთ ღია გაკვეთილს. სურვილი მაქვს, ეს სცენაზე მოხდეს, მაგრამ ჯერ ზუსტად არ ვიცი. ამ ეტაპზე ორი მკერავი გვიკერავს ფორმებს – ზოგი საქართველოში, ზოგი კი იტალიაში იკერება. როგორც კი მზად ვიქნებით, აუცილებლად მივიღებთ მონაწილეობას საერთაშორისო ფესტივალებში.

იტალიური ტელევიზია დაინტერესდა თქვენი სტუდიით. რას გვეტყვით ამაზე?

გასულ წელს იტალიურმა ტელევიზიამ სტუდიაზე რეპორტაჟი მოამზადა. გადაიღეს რეპეტიციები, ესაუბრნენ ბავშვებსა და მშობლებს. როცა ტელევიზიით ვნახე, როგორ აფასებდნენ ჩვენს საქმიანობას, ძალიან ამაყი და ბედნიერი ვიყავი.

იტალია

სალომე დარჩია: “ეს ბავშვები ჩემი ოჯახი გახდნენ”

როგორ მოხვდით სტუდია “ფესვებში”?

პროფესიით ქორეოგრაფი ვარ. ემიგრაციამდე ოზურგეთის კულტურის სახლში თანამედროვე ცეკვებს ვასწავლიდი და ბავშვთა ქორეოგრაფიულ ანსამბლ „მანანურში“ პედაგოგად ვმუშაობდი. როცა ბარიში ქართული ცეკვის სტუდია გაიხსნა, შემთხვევით აღმოვაჩინე სოციალურ ქსელში და ხელმძღვანელთან, ქალბატონ ლელასთან, კონტაქტი დავამყარე. თავდაპირველად პირადი თხოვნით მივმართე, რადგან ჩემი შვილი სკოლას ამთავრებდა და მასთან ერთად ვერ ვიყავი. სტუდიის დახმარებით ვიდეო-მილოცვა გავამზადე. შემდეგ კი ქალბატონმა ლელამ შემომთავაზა სტუდიაში მუშაობა. არც დავფიქრებულვარ, ისე დავთანხმდი.

რას ნიშნავს თქვენთვის სტუდიაში მუშაობა?

სამი შვილის დედა ვარ და ემიგრაციაში მათ გამო წამოვედი. როცა ამ ბავშვებს ვასწავლი, ჩემი შვილების მონატრება მავიწყდება. რამდენიმე იტალიურ ოჯახში შემომთავაზეს სამსახური, მაგრამ სტუდიის დატოვება მომიწევდა, ამიტომ უარი ვთქვი. “ფესვებში” ჩემი ოჯახი ვიპოვე და მინდა, ამ ბავშვებს ქართული კულტურა შევაყვარო.


საემიგრაციო მედიაპლატფორმა AprioriTV ქალბატონ ლელას, ბატონ აკაკისა და სალომეს მადლობას ვუხდით ემიგრანტი ბავშვებისთვის ამ მნიშვნელოვანი საქმიანობისთვის. ვუსურვებთ წარმატებას და იმედი გვაქვს, მათი სტუდია კიდევ ბევრ ქართველ ემიგრანტ ბავშვს დაუბრუნებს ქართულ ფესვებს.

სტატია მოამზადა ქეთი თუშურმა

იტალია/ქალაქი ბარი

Leave A Reply

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *

Related Posts